آسٹریلوی کرکٹر سٹیو سمتھ کا ون ڈے کرکٹ سے ریٹائرمنٹ کا اعلان

میلبرن: آسٹریلیا کے مایہ ناز کرکٹر سٹیو سمتھ نے ون ڈے کرکٹ سے ریٹائر منٹ کا اعلان کر دیا۔کرکٹ آسٹریلیا کے مطابق سٹیو سمتھ نے بھارت کیخلاف میچ کے بعد ساتھی کھلاڑیوں کو فوری ریٹائرمنٹ کا بتایا۔کرکٹ آسٹریلیا کا کہنا ہے کہ سٹیو سمتھ ٹیسٹ اور ٹی 20 کرکٹ کے لیے دستیاب ہوں گے۔اس حوالے سے سٹیو سمتھ نے کہا ہے کہ یہ سفر میرے لیے بڑا شاندار رہا ہے، میں نے ہر لمحے سے پیار کیا ہے، حیران کن لمحات اور شاندار یادیں رہی ہیں، دو ورلڈ کپ جیتنا کیریئر کی سب سے بڑی کامیابی ہے۔سٹیو سمتھ کا کہنا ہے کہ اب لوگوں کے پاس موقع ہے کہ وہ ورلڈ کپ 2027 کی تیاری کریں، ٹیسٹ کرکٹ میرے لیے ترجیح رہے گی۔انہوں نے کہا کہ میں ورلڈ ٹیسٹ چیمپئن شپ کے فائنل کا منتظر ہوں، دورہ ویسٹ انڈیز اور پھر انگلینڈ ہوم سیریز کا منتظر ہوں، میں سمجھتا ہوں کہ میں اس وقت کرکٹ میں بہت حصہ ڈال سکتا ہوں۔واضح رہے کہ چیمپئنز ٹرافی میں سٹیو سمتھ نے پیٹ کمنز کی غیر موجودگی میں آسٹریلوی ٹیم کی کپتانی کی تھی، چیمپئنز ٹرافی میں آسٹریلیا کو سیمی فائنل میں بھارت کے ہاتھوں شکست ہوئی۔یاد رہے کہ سٹیو سمتھ نے 2010 میں لیگ سپنر کی حیثیت سے کیریئر کا آغاز کیا، انہوں نے 170 ون ڈے میچوں 5800 رنز بنائے، آسٹریلوی بیٹر نے اپنے کیریئر میں 12 سنچریاں، 35 نصف سنچریاں بنائیں جبکہ 28 وکٹیں بھی حاصل کیں۔