دولہا شادی سے ایک روز قبل اپنے ہی گھر سے فرار

تلنگانہ: شادی نئی زندگی کی شروعات ہوتی ہیں جس میں دو مختلف انسان زندگی بھر کیلئے ایک دوسرے کا ساتھ نبھانے کا عہد کرتے ہیں لیکن ایک دولہا اپنی شادی سے ایک دن قبل ہی اپنے گھر سے فرار ہوگیا۔یہ عجیب واقعہ بھارت کی ریاست تلنگانہ میں پیش آیا جہاں لڑکی والے بارات کی راہ تکتے رہے لیکن بارات کے بجائے یہ روح فرسا خبر سامنے آئی کہ دولہا اپنے ہی گھر سے شادی سے ایک دن قبل فرار ہو چکا ہے۔بھارتی میڈیا کے مطابق چٹیال گاؤں کی ایک لڑکی کی شادی پٹہ منڈل کے علاقے کے رہائشی سے طے ہوئی تھی، 9 مارچ کو بارات کی تاریخ طے ہوئی، اس دن لڑکی والوں نے دولہا اور باراتیوں کے استقبال کی تمام تر تیاریاں مکمل کر لی تھیں۔تاہم لڑکی والے بارات کے منتظر رہے جبکہ ہونے والا دولہا شادی سے ایک دن قبل اپنے دلہن کو چھوڑ کر ایک اور لڑکی کے ساتھ گھر سے فرار ہوگیا۔یہ خبر ملتے ہی دونوں خاندان سکتے میں آ گئے جبکہ لڑکی کے رشتہ دار اور گاؤں کے لوگ چریال پولیس سٹیشن جا پہنچے۔